Новыя вуліцы ў гонар беларускага паэта Максіма Лужаніна і народнага мастака Беларусі Леаніда Шчамялёва з’явяцца на карце Мінска. Такое рашэнне прыняў Мінскі гарадскі савет дэпутатаў яшчэ 24 сакавіка, а ў суботу яно было афіцыйна апублікавана.
Вуліцы з’явяцца на тэрыторыі эксперыментальнага шматфункцыянальнага комплекса «Мінск Свет». Імя Шчамялёва прысвояць праектуемай вуліцы №13, Лужаніна — праектуемай №14.
Акрамя таго, гарсавет удакладніў напісанне назвы новай плошчы, якая з’явілася на месцы аэрапорта Мінск-1. Цяпер яе правільная назва выглядае як «плошча Стары Аэрапорт».
Рашэнне ўступае ў сілу пасля апублікавання.
Максім Лужанін (сапраўднае імя Аляксандр Каратай) — беларускі паэт, празаік, публіцыст, кінадраматург, перакладчык. Нарадзіўся ў 1909 годзе ў вёсцы Прусы Слуцкага павета, цяпер гэта Салігорскі раён. Пачаў друкавацца як паэт з 16 гадоў. Быў сябрам «Маладняка», працаваў у часопісе «Узвышша». У 1933 годзе быў арыштаваны па сфабрыкаванай справе «Беларускай народнай грамады» і правёў два гады ў лагеры ў Сібіры. У 1956 годзе быў рэабілітаваны. Пасля вайны Лужанін быў асабістым сакратаром Якуба Коласа, працаваў у газетах і часопісах. Аўтар шматлікіх паэтычных зборнікаў, празаічных твораў, вершаў і апавяданняў для дзяцей, некалькіх сцэнарыяў і кніг публіцыстыкі. Памёр 13 кастрычніка 2001 года ў Мінску.
Леанід Шчамялёў — жывапісец, педагог, народны мастак і заслужаны дзеяч мастацтваў Беларусі, лаўрэат Дзяржаўнай прэміі Беларусі (1982), прэміі Саюзнай дзяржавы (2010), кавалер ордэна Айчыннай вайны І і ІІ ст., Францыска Скарыны, уладальнік знака Міністэрства культуры Рэспублікі Беларусь «За ўклад у развіццё культуры Беларусі» (2003), ганаровы грамадзянін Мінска (2003). Нарадзіўся 5 лютага 1923 года ў Віцебску — сёлета было стагоддзе мастака. Памёр Шчамялёў 14 студзеня 2021 года.